മുരിങ്ങ: പോഷണവും ഔഷധവും തുന്നിച്ചേർത്ത MIRACLE TREE

ഇന്നത്തെ പോലെ ലാബുകളിൽ മരുന്നുകൾ കണ്ടുപിടിക്കുന്നതിനും എത്രയോ മുൻപേ, പ്രകൃതിയെ നിരീക്ഷിച്ചാണ് മനുഷ്യൻ ജീവിച്ചിരുന്നത്. അസുഖങ്ങൾ മാറ്റുന്ന ചെടികളെ അവർ തിരിച്ചറിയുകയും അത് തലമുറകളായി പറഞ്ഞു കൊടുക്കുകയും ചെയ്തു. മുരിങ്ങ അത്തരത്തിലൊന്നാണ് അതൊരു 'സൂപ്പർഫുഡ്' എന്ന വലിയ ലേബലിലല്ല നമ്മുടെ ഇടയിലേക്ക് വന്നത്, മറിച്ച് ഭക്ഷണമായും രോഗം മാറ്റാനുള്ള ഒരു വഴിയായും പണ്ടേ കൂടെയുള്ളതാണ്.

മുരിങ്ങയുടെ ഒരു പ്രത്യേകത എന്താണെന്നുവെച്ചാൽ, ഇതിന്റെ ഏകദേശം എല്ലാ ഭാഗങ്ങളും അതായത്  ഇല, കായ, വേര്, തൊലി, വിത്ത്, പൂവ്, പശ, എണ്ണ ഓരോ ആവശ്യങ്ങൾക്കായി ഉപയോഗിക്കാം എന്നതാണ്. മുരിങ്ങ ഒരു 'കംപ്ലീറ്റ് ഔഷധവ്യൂഹം' (Complete system) പോലെയാണ്.

നാട്ടിൻപുറങ്ങളിൽ പണ്ട് മുരിങ്ങയില അരച്ച് നീർവീക്കത്തിനും തലവേദനയ്ക്കും ശ്വാസതടസ്സത്തിനുമൊക്കെ പുരട്ടുമായിരുന്നു. മുരിങ്ങക്കായ വെറുമൊരു കറിയായല്ല, ശരീരത്തിന് ബലഹീനതയുള്ളപ്പോഴും സന്ധിവേദനയുള്ളപ്പോഴും നല്ലതാണെന്ന് അവർക്കറിയാമായിരുന്നു. മുറിവുകൾക്കും ചർമ്മരോഗങ്ങൾക്കും മരത്തിന്റെ തൊലി ഉപയോഗിച്ചപ്പോൾ, അല്പം കൂടി ഗൗരവമുള്ള അസുഖങ്ങൾക്ക് (ഉദാഹരണത്തിന് അൾസർ, കിഡ്‌നി സ്റ്റോൺ, ലിവർ പ്രശ്നങ്ങൾ) വേരുകൾ ഉപയോഗിച്ചു.

മരത്തിൽ നിന്ന് വരുന്ന പശ പോലും മരുന്നായി ഉപയോഗിച്ചിരുന്നു എങ്കിലും മുരിങ്ങ നല്ല പവർഫുൾ ആണെന്നും അതുകൊണ്ട് തന്നെ ശ്രദ്ധിച്ചുമാത്രമേ ഉപയോഗിക്കാവൂ എന്നും പാരമ്പര്യ വൈദ്യന്മാർ എപ്പോഴും ഓർമ്മിപ്പിക്കാറുണ്ടായിരുന്നു.

ആധുനിക പഠനങ്ങളും ഈ പാരമ്പര്യ അറിവുകൾ ശരിയാണെന്ന് തന്നെയാണ് ശാസ്ത്രീയമായി തെളിയിക്കുന്നത്.

ഭക്ഷണവും മരുന്നും തമ്മിലുള്ള അതിർവരമ്പുകൾ മായുമ്പോൾ

മുരിങ്ങയില ഭക്ഷണമാണോ മരുന്നാണോ എന്ന് വേർതിരിക്കാൻ പാടാണ്, കാരണം അതിൽ രണ്ടിന്റെയും ഗുണങ്ങളുണ്ട്. ഒറ്റനോട്ടത്തിൽ പോഷകങ്ങളുടെ ഒരു വലിയ കലവറയാണത് വിറ്റാമിൻ A, C, B-കോംപ്ലക്സ് എന്നിവയും അയൺ, കാൽസ്യം, സിങ്ക് തുടങ്ങിയ മിനറൽസും ഇതിൽ നിറഞ്ഞിരിക്കുന്നു. ശരീരത്തിന്റെ വളർച്ചയ്ക്കും കേടുപാടുകൾ തീർക്കാനും സഹായിക്കുന്ന 18-ഓളം അമിനോ ആസിഡുകൾ ഇതിലുണ്ട്.

പക്ഷെ ഇതിന്റെ ഗുണം വെറും പോഷകങ്ങളിൽ മാത്രം ഒതുങ്ങുന്നില്ല.

മുരിങ്ങയിലയിൽ ഒരുപാട് 'ഫൈറ്റോകെമിക്കലുകൾ' (Phytochemicals) അടങ്ങിയിട്ടുണ്ട്. ഇവ നമ്മുടെ ശരീരത്തിലെ മെറ്റബോളിക്  പ്രവർത്തനങ്ങളെ സഹായിക്കുകയും, വീക്കങ്ങൾ കുറയ്ക്കുകയും, കോശങ്ങൾ നശിക്കുന്നത് തടയാൻ സഹായിക്കുകയും ചെയ്യുന്നു.

ചർമ്മകോശങ്ങൾ നശിക്കുന്നത് തടയാനും, കിഡ്‌നിയിലുണ്ടാകുന്ന ചില പ്രശ്നങ്ങൾ കുറയ്ക്കാനും മുരിങ്ങയ്ക്ക് കഴിയുന്നത് അതുകൊണ്ടാണ്. വിളർച്ചയുള്ള (Anemia) സ്ത്രീകളിൽ ഹീമോഗ്ലോബിൻ കൂട്ടാനും, പ്ലേറ്റ്‌ലെറ്റ് എണ്ണം വർദ്ധിപ്പിക്കാനും, രോഗപ്രതിരോധ ശേഷി മെച്ചപ്പെടുത്താനും മുരിങ്ങ സഹായിക്കുമെന്ന് കണ്ടിട്ടുണ്ട്.

മുരിങ്ങ ശരീരത്തെ അമിതമായി ഉത്തേജിപ്പിക്കുകയല്ല ചെയ്യുന്നത്, പകരം ശരീരത്തിന്റെ ബാലൻസ് പതിയെ വീണ്ടെടുക്കുകയാണ്. മാറാരോഗങ്ങളുള്ളവർക്ക് ഇത് വലിയൊരു ആശ്വാസമാണ്.

വിത്തുകൾ, കായകൾ, വേരുകൾ: മറഞ്ഞിരിക്കുന്ന പവർ

നമ്മൾ കൂടുതൽ ശ്രദ്ധ കൊടുക്കുന്നത് മുരിങ്ങയിലയ്ക്കാണെങ്കിലും, മുരിങ്ങയുടെ മറ്റ് ഭാഗങ്ങൾക്കും വലിയ ഗുണങ്ങളുണ്ട്.

നമ്മുടെ പാചകത്തിൽ സ്ഥിരമായ മുരിങ്ങക്കായയിൽ അണുക്കളെയും പൂപ്പലുകളെയും (Antimicrobial & Antifungal) നശിപ്പിക്കാനുള്ള പവർ ഉണ്ട്. ലിവർ നല്ല രീതിയിൽ പ്രവർത്തിക്കാനും സന്ധികളിലെ നീർവീക്കം കുറയ്ക്കാനും ഇത് സഹായിക്കും.

മുരിങ്ങ വിത്തുകൾ ചെറുതാണെങ്കിലും ഭയങ്കര പവർഫുൾ ആണ്. ഇതിൽ മനുഷ്യ ഇൻസുലിനോട് സമാനമായ ചില പ്രോട്ടീനുകളുണ്ട്. അതുകൊണ്ട് തന്നെ ബ്ലഡ് ഷുഗർ കുറയ്ക്കാൻ ഇത് സഹായിക്കും. സന്ധിവാതം (Arthritis) കുറയ്ക്കാനും ട്യൂമറുകളുടെ വളർച്ച തടയാനും വിത്തിലെ ഘടകങ്ങൾക്ക് കഴിയുമെന്ന് പരീക്ഷണങ്ങൾ കാണിക്കുന്നു.

മുരിങ്ങയുടെ വേരും തൊലിയുമാണ് ഈ മരത്തിലെ ഏറ്റവും ശക്തമായ ഭാഗങ്ങൾ. വീക്കവും  തടയാൻ ഇതിന് വലിയ കഴിവുണ്ട്. പാരമ്പര്യ വൈദ്യത്തിൽ കിഡ്‌നി സ്റ്റോണിനും അൾസറിനുമൊക്കെ വേരുകൾ ഉപയോഗിച്ചിരുന്നു, എന്നാൽ അത് ഒരിക്കലും നിസ്സാരമായി കണ്ടിരുന്നില്ല. ശരീരത്തിൽ വലിയ മാറ്റങ്ങൾ വരുത്താൻ ഇതിന് ശേഷിയുള്ളതുകൊണ്ട് വളരെ ശ്രദ്ധിച്ചുമാത്രമേ ഇവ ഉപയോഗിക്കാവൂ.

കോശങ്ങൾക്കുള്ള സംരക്ഷണം: ലിവറും മെറ്റബോളിസവും

പ്രായമാകുന്നതും പല അസുഖങ്ങൾ വരുന്നതും ശരീരത്തിലെ കോശങ്ങൾ നശിക്കുന്നത് (Oxidative Stress) കൊണ്ടാണ്. മുരിങ്ങയിലയിലെയും തണ്ടിലെയും സത്തുകൾ ഈ കോശനാശം തടയാൻ സഹായിക്കുന്നു.

ഈ ഗുണം നമ്മുടെ പ്രധാന അവയവങ്ങൾക്കും ലഭിക്കും. ഉദാഹരണത്തിന്, മരുന്നുകൾ അമിതമായി കഴിക്കുന്നത് കൊണ്ട് കരളിലുണ്ടാകുന്ന കേടുപാടുകൾ കുറയ്ക്കാൻ മുരിങ്ങ സഹായിക്കും. കൊഴുപ്പ് നിയന്ത്രിക്കാനും, തടി കുറയ്ക്കാനും, ഷുഗർ ലെവൽ നോർമൽ ആക്കാനും മുരിങ്ങ നല്ലതാണ്. ഇതൊരു 'മെറ്റബോളിക് സ്റ്റെബിലൈസർ' പോലെയാണ് പ്രവർത്തിക്കുന്നത് അതായത് വലിയൊരു മാറ്റം പെട്ടെന്ന് ഉണ്ടാക്കുന്നതിന് പകരം ശരീരത്തെ സാവധാനം ആരോഗ്യകരമായ അവസ്ഥയിലേക്ക് എത്തിക്കുന്നു.

ദഹനത്തിന്റെ കാര്യത്തിലും അൾസർ വരുന്നത് തടയാനും വയറിലെ അസിഡിറ്റി കുറയ്ക്കാനും ഇതിന് സാധിക്കും. പണ്ടുമുതലേ വയറിളക്കത്തിനും കുടൽവീക്കത്തിനും ചികിത്സയായി മുരിങ്ങ ഉപയോഗിച്ചിരുന്നു.

പവർഫുൾ ആണ്, അതുകൊണ്ട് സൂക്ഷിച്ചു  ഉപയോഗിക്കണം

മുരിങ്ങയ്ക്ക് എന്ത് ചെയ്യാൻ കഴിയും എന്നതിനേക്കാൾ പ്രധാനമാണ് അത് എത്ര ശ്രദ്ധയോടെ ഉപയോഗിക്കണം എന്നത്.

മുരിങ്ങയുടെ സത്തുകൾക്ക്, പ്രത്യേകിച്ച് ഇലയുടെയും വേരിന്റെയും അമിതമായ ഉപയോഗം ഗർഭച്ഛിദ്രത്തിന് (Abortifacient) വരെ കാരണമായേക്കാം എന്ന് പഠനങ്ങൾ പറയുന്നു. ഇത് ഗർഭാശയ സങ്കോചമുണ്ടാക്കി ഗർഭസ്ഥ ശിശുവിനെ ബാധിച്ചേക്കാം. മുരിങ്ങ എത്രത്തോളം സ്ട്രോങ്ങ് ആണെന്ന് കാണിക്കുന്ന കാര്യമാണിത്.

അതുകൊണ്ടാണ് ഗർഭിണികളും മുലയൂട്ടുന്ന അമ്മമാരും ഡോക്ടറുടെ നിർദ്ദേശമില്ലാതെ മുരിങ്ങയിലയോ അതിന്റെ സപ്ലിമെന്റുകളോ ഉപയോഗിക്കരുത് എന്ന് പറയുന്നത്.

മിതമായ അളവിൽ ഉപയോഗിക്കുമ്പോൾ മുരിങ്ങ സേഫ് ആണ്. എന്നാൽ ദീർഘകാലം അമിതമായി ഉപയോഗിക്കുന്നത് ലിവറിനെയും കിഡ്‌നിയെയും ബാധിച്ചേക്കാം. ഒരു ദിവസം ഏകദേശം 70 ഗ്രാമിൽ കൂടുതൽ കഴിക്കാതിരിക്കുന്നതാണ് നല്ലത്.

നമ്മുടെ ഡെയിലി ലൈഫിൽ മുരിങ്ങ സ്വാഭാവികമായി ഉപയോഗിക്കാം. സാമ്പാറിലെ മുരിങ്ങക്കായയായും, തോരൻ വെച്ച ഇലയായും, മാവുകളിൽ ചേർക്കുന്ന മുരിങ്ങയിലപ്പൊടിയായുമൊക്കെ ഇത് ഉപയോഗിക്കാം ഇവയെല്ലാം നമ്മൾ കാലങ്ങളായി കൊണ്ടുനടക്കുന്ന നല്ലൊരു ശീലമാണ്.

എല്ലാ അസുഖങ്ങളും മാറ്റുന്ന ഒരു 'അത്ഭുത മരുന്ന്' ആയതുകൊണ്ടല്ല മുരിങ്ങ സ്പെഷ്യൽ ആകുന്നത്. മറിച്ച്, ശരീരം എവിടെയാണോ തളർന്നിരിക്കുന്നത് അവിടെ താങ്ങായി നിൽക്കുന്നത് കൊണ്ടാണ്. വേഗത്തിലുള്ള ഫലങ്ങൾക്കായി ഓടുന്ന ഇന്നത്തെ ലോകത്ത്, ആരോഗ്യം എന്നത് നമ്മുടെ വീടിന് അരികിൽ തന്നെ വളരുന്നതാണെന്ന് മുരിങ്ങ നമ്മെ ഓർമ്മിപ്പിക്കുന്നു.

• അറിവോടെ ഉപയോഗിച്ചാൽ മുരിങ്ങ നമ്മെ പോഷിപ്പിക്കുന്നു.

• തെറ്റായി ഉപയോഗിച്ചാൽ അത് പ്രശ്നമുണ്ടാക്കാം.

  
  

  ശ്രദ്ധയോടെ കൈകാര്യം ചെയ്താൽ അത് ഒരേസമയം ഭക്ഷണവും മരുന്നുമാണ്: അത് എന്നും അങ്ങനെയായിരിക്കും .

REFERENCES

• Pareek A, Pant M, Gupta MM, Kashania P, Ratan Y, Jain V, Pareek A, Chuturgoon AA. Moringa oleifera: An Updated Comprehensive Review of Its Pharmacological Activities, Ethnomedicinal, Phytopharmaceutical Formulation, Clinical, Phytochemical, and Toxicological Aspects. Int J Mol Sci. 2023 Jan 20;24(3):2098. doi: 10.3390/ijms24032098. PMID: 36768420; PMCID: PMC9916933.

• Dr. Malavika Athavale (2025 Sept ) Moringa Leaves – Health Benefits That You Should Know ,Pharmeasy https://pharmeasy.in/blog/16-health-benefits-of-moringa-leaves/

• Kashyap, P., Kumar, S., Riar, C. S., Jindal, N., Baniwal, P., Guiné, R. P. F., Correia, P. M. R., Mehra, R., & Kumar, H. (2022). Recent Advances in Drumstick (Moringa oleifera) Leaves Bioactive Compounds: Composition, Health Benefits, Bioaccessibility, and Dietary Applications. Antioxidants, 11(2), 402. https://doi.org/10.3390/antiox11020402